NIPO TAYARI KUHAMIA TIMU YOYOTE LAKINI SIO KUBAKI MANCHESTER UNITED-ROONEY

MSHAMBULIAJI Wayne Rooney ataangalia uwezekano wa kuhamia nje ya England, iwapo hatafanikiwa kuhamia Chelsea majira haya ya joto.

Mshambuliaji huyo wa Manchester United anatarajiwa kuwasilisha barua ya maombi ya kuondoka wiki hii ili kutilia mkazo wa ofa ya Pauni Milioni 30 kuhamia Stamford Bridge kujiunga na kocha mreno mwenye maneno mengi Jose Mourinho kocha ambaye amekua kipenzi cha Rooney kwa muda mrefu na anaona kama wakati sahihi sasa kutimiza ndoto yake.

Kocha wa Manchester United, David Moyes ambaye anaaminika kutaka kumsajili kiungo wa Everton, Marouane Fellaini, ameendelea na msimamo wake akisema hadharani hatamuuza Rooney kwa klabu wapinzani wao wakuu wa Ligi Kuu England.

Rooney na Chelsea kwa pamoja wanaendeela kuamini kwamba United na kocha wao mpya, David Moyes watachemsha tu kutokana na jinsi ambavyo mshambuliaji huyo mwenye umri wa miaka 27 anaendelea kutilia mkazo suala la kuondoka baada ya kuitumikia klabu hiyo kwa miaka tisa.

Ikiwa hawatamruhusu, Rooney ameamua bora kuhamia klabu nyingine itakayomvutia barani Ulaya kuliko kubaki Old Trafford.

Inafahamika kwamba Rooney hahofii kuhamia popote, lakini atafurahi kwenda na mkewe Colleen na watoto wao wawili wadogo katika timu ya Ulaya itakayotoa ofa nzuri, ili aondoke Old Trafford.

Rooney Hakuwemo katika kikosi cha United kilichokwenda kucheza na AIK Stockholm nchini Sweden jana kujiandaa na msimu, kutokana na maumivu ya bega na Rooney anatarajiwa kupona maumivu hayo aliyoyapata mazoezini mwishoni mwa wiki. Anaweza kuwa tayari kwa safari ya Wembley ambako Moyes atapeleka kikosi chake kwania Ngao ya Jamii dhidi ya Wigan Jumapili.

Marouane Fellaini, akifanya mazoezi na Everton jana, anaweza kuhamia Manchester United kujiunga na kocha wake wa zamani Moyes kama mbadala wa Cesc Fabregas anayeonekana kung'ang'aniwa na Barcelona.