MELI YA TANZANIA YAKAMATWA ITALIA IKIWA NA SHEHENA YA DAWA ZA KULEVYA

 

Meli iitwayo Gold Star imekamatwa karibu na pwani ya Italia ikiwa na zaidi ya tani 30 za dawa za kulevya ambapo Polisi wa Italia wamesema documents zinaonesha ilisajiliwa Tanzania.

Taarifa nyingine ya polisi imesema mzigo huo una thamani ya poundi millioni 50 ambayo kwa pesa za kitanzania ni kama 126,582,278,481 na meli yenyewe ilikua na timu ya watu tisa ambao wanatoka Misri na Syria na mzigo wote wameupakia kutoka Uturuki.

 
Unaambiwa baada ya kuona mchezo wao umefahamika, watu waliokuwemo kwenye meli waliamua kuanza kuichoma moto meli hiyo na wote tisa walijirusha baharini kwa nia ya kutaka kukimbia lakini wakakamatwa mapema tu na kukutwa na hizo dawa za kulevya aina ya hashish ambazo thamani yake inagonga kwenye £Paundi milioni 50.

Bandari husika ya Italia walipewa taarifa kwa siri mapema siku kadhaa kwamba meli hii ilikua imebeba tani nyingi za dawa za kulevya hivyo wakawa wanaifuatilia kwa siku kadhaa kabla ya kuikamata.

Msemaji wa bandari amesema hawakutegemea kama meli hiyo ingekua imebeba kiasi hicho cha dawa za kulevya na pia hawakutegemea kama watu waliokuwemo ndani yake wangeichoma moto ili kupoteza ushahidi japo zoezi hilo halikufanikiwa na dawa zikaonekana.

Meli hiyo imesogezwa kabisa mpaka kwenye bandari na moto umezimwa huku msako zaidi ukiendelea kwenye sehemu nyingine za meli hiyo ili kuona kama kuna dawa nyingine za kulevya huku watu wote tisa wakiwa wanaendelea kuhojiwa.

CHANZO: MILLARD AYO