MGOMO WA MALORI: MAGUFULI ATEMA CHECHE

Kufuatia mgomo wa malori unaoendelea waziri wa ujenzi Mh. John Magufuli amesema hatabadilika kwani anasimamia sheria na anayetaka kugoma aendelee kugoma lakini asipeleke gari lake barabarani huku chama cha wamiliki wa mabasi Taboa wakitishia kuanza mgomo Octoba nane mwaka huu kwa madai kuwa mapendekezo yao ya mabasi kusafiri bila kupita mizani yamepuuzwa.

 Kauli ya waziri imekuja siku mbili baada ya wamiliki wa malori kuanza mgomo Octoba tano mwaka huu uliosababisha msongamano mkubwa wa magari katika barabara ya Morogoro ambapo amesema sheria haibadilishwi kwa barua na kuongeza kuwa anayeona ameonewa aende mahakamani na kwenda mbali zaidi kwa kudai kuwa baada ya wizara kuajiri wafanyakazi wapya kwenye vituo vya mizani mianya ya rushwa imefungwa ndio maana wanaozidisha uzito wameamua kugoma.

Kufuatia kauli hiyo ITV imemtafuta msemaji wa wamiliki wa malori nchini Bw Elias Lukumai ambaye amesema wataendelea kuegesha malori yao popote yalipo hadi ufumbuzi utakapopatikana huku katibu mkuu wa Taboa Bw Severin Ngalo akidai kuwa tayari wameshatoa tangazo la kusitisha huduma usafiri wa mabasi yaendayo mikoani na nchi jirani hadi maombi yao yatakaposikilizwa.

Kwa upande wao baadhi ya madereva wa malori wakizungumza na ITV mbali na kuelekeza lawama kwa serikali juu ya kutokuwashirikisha wamiliki wa malori wakati wa kurejesha asilimia tano ya uzito unaozidi wameelezea athari wanazopambana nazo baada ya wenye malori kugoma.